لا تسألوني ليش خبَّيتو
السرّ المَعي، وللناس ما حكَيتو؟
عيونا حِبْر أخضر، متل شي بحْر
ومَرْكب إلي لبعيد وَدّيتو…
وشَعرا الطويل المِن جدايِل شقْر
من شَكْلتين زغار فكَّيتو…
وزرّ انفتَح عا كلّ معرَض سحْر
عا مطْرحو ما عرفتْ ردّيتو…
شو خصّني بالميجنا والشعر
تا البيت بعد البيت غنَّيتو؟
وهْدَيتْها قنّينتَين العطْر
وسلسال غالي كتير نَقّيتو…
قصّة عمْر بيناتنا، والعمر
لو ما التقيْنا كنت ما لْقَيتو
ولا كنت بتغزّل ببرمِة خصْر
وفستان قدّ الشبْر حَبّيْتو.
______
*مشروع الأديب الدكتور جميل الدويهي “أفكار اغترابيّة” للأدب الراقي
النهضة الاغترابيّة الثانية – تعدّد الأنواع