*
من سنين عمري
يا وقّفولي الريح عالحيطان
يا لزّقُولي الوقت، ما يمشي
من سنين عمري نسّلو الخيطان
وما في نعَس بيطلّ عا رمشي…
….
يا هالقمر بتضلّ عالشبّاك
ملبّك أنا، وعا وجّك الضحكه…
قدّيش بتٰقاتل أنا ويّاك
بحْكي جَريدِه، وإنتْ ما بتحْكي…
….
وشجره عتيقه حدّ باب البيت
كتبنا الأسامي تحت غِرّتها
حبّبت زورا بعد ما فلّيت
ما لقيتها، ولا لقيت فَيّتها…
….
مشغول فكري، لوين بدّي روح؟
والليل فوق السهل بردايه..
عنوان بيتي خاطري المجروح
وصورِة حَدا غيري عالمرايه.
….
وعندي قصيده بلون عنّابي
مين السرقها، وانمحٓى اسمي؟
واللي بقي لي غيم عا كتابي
وصورة سفينة نُوح… عا جسمي.
***
*مشروع الأديب د. جميل الدويهي أفكار اغترابيَة للأدب الراقي
النهضة الاغترابية الثانية – تعدد الأنواع.