*
كان الحبَق عا دْراج ضَيعتنا
والغيم أبيض فوق تلّتنا
وختْيارة البتْخبّر حْكايات
غفيتْ قبل ما تشُوف دَمعتنا
بْلون الحِبر عم يِكبَرو الغابات
وعم يزْغرو إيّام رجْعتنا
ورفّ الطيور الكان صبحيّات
يسْرق عنَب من كرْم جارتنا
بتشرِين فَلّ، وفِضيتْ الساحات…
ما ضلّ غير خْيال ضحْكتنا…
يا ريت فينا نفركِش الساعات
ونغيّر مْواعيد رحْلتنا!
عا بالنا معزُوفة النايات
وفِنْجان قهوه تحت لوزتنا…
وهاك القَمر ينْزَل من الغَيمات
وكلما طريقو يضيّعو بالليل
بيكُون عم يلْفي عَ خَيمِتنا.
_____
*جميل الدويهي: مشروع “أفكار اغترابيّة” للأدب الراقي
النهضة الاغترابيّة الثانية – تعدّد الأنواع