سألْنا قتيل الهوى تا نعْرفو مينو
تخْمين هُوّي افْتكرنا من عَدوّينو
يا ريت إلنا حِكي عاللي جَرى وانْقال
وليش الزمن ما هِدي، ونحْنا مَساكينو؟
باعِت رِسالة عَتب للبنت إمّ الشال
ولو كان بعْدو الكحْل سطرَين عا جْبينو
والياسْمين الرقيق بْفيّة العرزال
من وقت ما تْزاعلو يبستْ شَرايينو.
ما عاد طَلّ الربيع المخْمَلي عالبال
هِرْبان مِنو الوَحي وقْلام تلْوينو
قاضي علينا حكَم… وتْغيّرو الأحوال
والشاعر اللي انظَلم… ما في حدا يْعينو…
صار الزعَل عا طَريقو شجْرتين طْوال
وكرمال شَعر الدهب ما راقت سْنينو
يا من جُروح القلب عم يطْلع الموَّال
يا قاعِد من الصبْح يقْلِب فَناجينو.
***
*د. جميل الدويهي: مشروع أفكار اغترابية للأدب الراقي
النهضة الاغترابية الثانية- تعدد الانواع