THAQAFIAT

يا خايفين

الليل ما بياكل بشر…

ولأيمتى منضلّ نحنا خايفين؟

صارت مشاعرنا حجر

صرنا حجر…

صرنا صوَر

وبيسألو الحيطان عنّا:

ليش ما منحكي

إذا كنّا الحقيقه عارفين؟

صار الخبْز متل القمر

من الصعب إنّو يوصلو العالم إلو…

وممنوع حتّى يسألو:

ليش البيوت تقفَّلو؟

وليش الزمن ما عاد مهضوم وحلو؟

وليش الولاد مشرّدين؟

وليش اختفي من  بيوتنا كيس الطحين؟

وليش المحطّه فاضيه من البنزين؟

والورد حدّ بوابنا صاير حزين؟

من بعد ما لبنان كان النور

صار العتم

صار الظلم

صرْنا فَرق عملِه بالبنوك…

وكلّنا عم نلعن ملوك العَلينا حاكمين.

تمرّد يا شعب

وقُوم من قلب الحريق…

وسكِّر مدينه كلّها…

وخبطة قدمنا ترجّ

ويرجّ الطريق…

معقول هيك نضلّ…

ناكل عشب

والحكّام عم يتغنْدرو

متل الكأنّو صوتنا مش سامعين؟

ومعقول طفل زغير ما يشرب حليب

وإمّ عم بتنوح عا طول السنين؟

تمرّد يا شعب…

وشو بِقي تا تخسرو

من بعد ما صار الوطن

طابور ناس معذّبين؟…

وكتار ماتو من القهر

لو كان بعدُن عايشين؟

ما في حدا يخربط حقيقه

غير نحنا…

وغير هالشعب الكبير…

معقول هالطرقات بعدا فاضيه

وعم تشحدو حبّة دوا

وعم تصرخو:

وين الضمير؟

وبيوتنا من غير ضو وكهربا…

وحتّى الهوا

عم يقطعو عنّا الهوا…

تمرّد يا شعب وقوم

تا نغيِّر سوا…

ما عاد بدنا نضلّ نمشي متل عسكر

خلف ناس معجرفبن

باعو الوطن

وتمرجلو علينا…

لأنّو ضعاف نحنا…

وفرّقونا بين دِين

وبين دِين…

وتا يقوم من قبرو الوطن…

لازم نعلّي الصوت

عللي عيّشونا بذلّ

ونهزّ الكراسي اللي عليها قاعدين.

يا شعب لبنان الحزين…

حلّك تهدّ الليل

وتخزّق تياب الموت

حلّك تفتح بواب العليك مسكّرين…

نحنا الفرح إلنا…

القمر إلنا…

وسما

 ونجوم فوق جبالنا

تريّات نور معلّقين…

نحنا النصر إلنا

عا أيّا كتاب بحلفلك يمين؟…

عا الشمس..

 عالإنجيل…

عالقرآن…

بحلفلك يمِين

عا كلّ دمعة طفل

بحلفلك يمِين…