”للموسيقار ملحم بركات”

مارون الماحولي

(شاعر- لبنان)

دَقّ الجَرَس… لمّا وِقِف قَلبَك
شوف السَما قِدّيش بِتحبَّك
يا بو مَجِد مَسِّح دموع الناس
صوتَك خَمِر يِنزُف بِقَلب الكاس
صار الوَقِت تَ يِسمَعَك رَبَّك
بَلَّش القِدّاس…
***
شو توقَف الكِلمه على بابَك
تا تِعزِما وتصير غنّيه
كلّ الدني هيّ
تْنَسِمْ موسيقى دَرفة كْتابَك
فَسَّخ جبل لبنان ع غيابَك
وكلما الصُبح صَوبَك كَرَج كَرجي
تِعلا الشَمس دَرجه
وتنقح عَراوي الضوّ ع تيابَك
***
حاسِسْ مِتِل… قَلبَك وَقَع مِنّي
قَسِّمْ عَ كِتْفي هَيْك طَمِّني
بإيد الصدى صَوتَك مَدى مشدود
جن البحر ت يسمع الرنة
غني بعد… في ناس بالجنّه
شو المقبرة!!! …. يِمكِن بَطِن شي عود
وجِسمَك وَتَر مَمدود
حتّى بَعِد ما يْموت… بيغَنّي

*****