الشاعر  اللبناني موريس عواد

لو ما ضيع بهاك الشارع
هاك اليوم، وشوفِك صدفي
عَ الشبّاك بهاك الوَقفي،
شَعرِك واقع، سرِّك واقع
وجِّك نازل بَدّو يلفي
عم يتمشّا بهاك الشارع.
كنتي الليلي وحدِك نمتي
وتكوّمتي
تحت حرامِك،
كنتي حلمتي إنّي جايي
حَتّا زهِّرلِك إيّامِك.
كنتي عطشتي، كنتي قمتي
بالليل شربتي كبّايي،
كنتي جَعلكتي التكّايي
من قهرِك، كنتي تمتمتي
إسم ، تنين ، تلاتي ، عَشرا،
وكنتي، كنتي، تخايلتيني
بإيدَيكي تفّاحا حَمرا،
ومتل الملهوفي كْدَشتيني
وعملتيلي صدري ساحا
وإنتي الطفلي العمرا عَشرا،
وقلتيلي، أول تفّاحا
ما بتتاكل إلاّ بقشرا.

*****

(*) من ديوان “بوسي بوستين تلاتي” – موريس عواد – 1972.