بقلم: قزحيا ساسين

كبيرِه
السنديانه بدّا تقنع الريح إنّا سنديانه، والريح بدّا تقنعا إنّا قشِّه كبيره.

غَرَق
الغرقان وما لاقا قشّه يتهدّا فيا، ما انوجع قدّ اللي غرق هوِّه وقشّتو.

بْيِفهم
العصفور عمَّر أوّل بيت بالقشّ، لأنّو بْيَعرف هيدي الدني ما بتستاهل أكتر من هيك.

حسابات
الغابِه ما بتخاف من العاصفه، لأنّا مش قشّه فيا تصَيِّرا غابة رماد.

إلا قيمِه
القشّه اللي بدّا قيمِه لَ حالا، ما بتضحك إلاّ لَ يللي عايزا.

مين اللي قاعد؟
في كرسة دهب أرخص من القشّ، وفي كرسة قشّ أغلا من الدهب… والسرّ باللي قاعد.

لا تدْعسا
القشّه اللي دَعَستا، بْيِجي يوم وبتعوزا… برنيطَه.

ملح
القشّ ملح الموقدِه.

مفتاح
القشّه مفتاح النار.

سؤال
تا تعرف القشّه شو بتعمل، لا تسأل الصدر، اسآل العين.

سَبَق
القشّ داق يسوع قبل شجر الزيتون.

لا تِتْعَب
الضحكه اللي ما بتلاقيا عا حصيرة القشّ، مش رح تشوفا عا بساط الريح.

وَلَو!
البريق اللي لابِس قشّ ما فيه يشوف حالو عالميَ اللي رابيِه بـ حضن القصب.

زبالِه ومكنسِه
فيا القشّه تضلّ زباله، وفيا تصير مكنسِه.

بـ مَطرَحا
القشّه بـ مطرحا… سنديانه.

من بعيد
تا تضلَّك متهنّي بـ كوخ القشّ، مَرْحِب لـ بيّاع الشمع من بعيد.

بَعد بيعوزَك
إللي ديّنتو حطب ورَدّلَّك قشّ، بعد بيعوزك تا يولّع حطباتو.

عا راسا
قشّة الكبريت تا صار ينحسبلا حساب، حملت النار… عا راسا.

… وْوِلْعِت
الحياة مش أكتر من مرجوحة قشّ، والموت مش أكتر من قشّة… كبريت.