الشاعر قزحيا ساسين

(لَـ صديقي طبيب العيون شربل فهد)

كلاّ
شو حلوه المرا اللي بتكون قاعده كلاّ سوَا بـ عيونا
.
اسْألو العين
مش كلّ مَيّه بتطلع من العين… دمعَه
.
بتشوف أكتر
العين اللي بتتطَلَّع لَ تحت بتشوف القمر والميّ، واللي بالا فوق، بتشوف القمر وحْدو
.
ما بـ عينا
العين ما بـ عَينا: هيّه بتشوف، والإصبع بيدلّ.

يا ريت
يا ريت العين ما بتخبّر الإيد إلاّ عا قدّ ما بتطال
.
أوقات
أوقات العين اللي بتشوف لَ بعيد، ما بتنعاز قدّ العين لْ ما بتشوف أبعد من المنخار
.
جوهرجي
العين أوّل جوهرجي، ولّو كان الدمع ما بينباع
.
بـْ غير مطرح
عين الأعما بـ دَينتو، وعين بيّاع الورد بـ منخارو، وعين الشكّاك بـ إصبعو… ما في عين بـ مطرحا
.
لَ جُوَّا
ما في عين ما بتشوف: في عين بتشوف لَ بَرّا، وعين بتشوف لَ جُوّا
.
بـ مَحلّو
ما في شي بينسرق وبيضلّ بـ محلّ و إلاّ اللي بتسرقو العين.

أبشع
تكبير العين أبشع من تكبير الراس
.
لا تواخزيني
يرضا عليكي، أنا ما فيّي كون متل الحاجب لْ بيشيب وما بيشوف العين اللي حارِسا
.
صابيعِك
ما في غير صابيعِك… بـِ عيوني
.
عالعَينتَين
إزا عالعين وكانو يتلاقو، كيف بدُّن الناس يشوفوكي بَلا ما يتلاقو عالعينتين؟!

نسر
النسر إلو تلات مناقير،في مِنُن تنَين بِـ عيونو
.
وصيّه
أوّل وصيّه بيقولا الغزال لَ إبنو: لا تخلّي إجرَيك يسبقو عيونك
.
الميّ مقطوعَه
بيخوِّف الإنسان اللي بتضلّ الميّ مقطوعَه… بِـ عيونو
.
عيارِه
اللي بيعِيرك عيونو، بدّك تضلّ تخبّرو شو عم بتشوف
.
صعبِه
العين ما بتنحطّ بالجَيبِه
.
بتكسر الشوكِه
العين بتكسر الشوكِه لمّا بتتطَلّع فيا هيِّه ومغمّضَه
.
مكنسِه
عين الزبّال، رموشا مكنسِه
.
ما بيِخرب بيتو
الحلا ما بيئزي العين، لأنّو ما بيخرب بيتو بـ إيدو

.
رَفقا
رَفقا اللي تَوبا مشعشع بـ عتم العَما
وما ضلّ جُوَّا عينَيا من الضوّ خَيط
من هَون لَ راس السَّما
مِشْيِت وطُول الدرب ما تهَدّت بـ حَيط