بْراج العتَب هلقدّ عَلّيتو
كتبْنا لكُن… بالكاد ردّيتو
مكتوب صَرْلو جمعتين زمان
مع جوقة عصافير ودّيتو…
صارو قِصصْنا كان يا ما كان
من وقت ما مْن الحَيّ فلّيتو
وتا تِذكْروني… وتعْرفو العنوان
قنديِل طُول الليل ضوّيتو…
هرّ الورق من شَجرة الرمّان
والصّيف هلّق راح عا بَيتو
وفوق التلال اجْردّت الألوان
ما قدِرت نَقّي لون حبّيتو!
كان القمَر بجْنينتي هرْبان
مِشْط الدهب… ومْرايتي عْطيتو
وبْخيمتي البتطلّ عالوديان
أربع خمس ساعات غَفّيتو…
صَوتي متل منجيرة الرعيان
وتا يقْطع مسافات؟ يا ريتو
عم شُوف بَركي برَغوة الفنجان
بْيمرقْ حَدا وبيقول إنتو وين…
ضَاع الحَدا وما عِدت لاقَيتو.
جامعة سيدة اللويزة
١١تشرين الثاني ٢٠١٢