الشاعر علي عجمي‎

                          ( لبنان)

القطب الشمالي زارنا بلبنان

والتلج لفلفنا بصقعاتو

ما ظل شي إلا صِفي بردان

وصار الهوا يصفع بلفحاتو

وصارت تكزكز وحدها الأسنان

البرد رقَّصها عصفعاتو

يا تلج هوِّنها على أبدان

لشدة صقيعك جَمَّدو وماتو

القطب الشمالي عاجبو اللي كان

استوطن وعِنَّا نصب راياتو

الظاهر عشيق وموطني عشقان

وبدلة عرس فارش عأرضاتو

لا تزيدها جليد و شقا و حرمان

من جنوبو لعند أرزاتو

تحت الصفر صرنا بلا عنوان

من الهم عم نلعب بتلجاتو

ورغم الجليد الفيك عالإنسان

الدولار ولّعها بطلعاتو

منشان هيكي شَبِّت النيران

وزادت على المحتاج حاجاتو

لبنان كلو استقبلك منشان

مضياف اسمو وهيك عاداتو