الشاعر د. علي عجمي

مِهِنة الكذب ماخذها اعتيادي

بحياتو الما فهش منها إفادة

بيحاول يقنعك في حكي صادق

و كلامو بالكذب واضح و بادي

تخصص كذب عندو لسان دافق

بخبرة وَصَّلِـت كل البوادي

و وعد عا وعد بالجملة و واثق

بكذبو المتقن و بلسان هادي

 على حبال الكذب لَعِّيب خارق

يا عيب الشوم بهدلت المبادي

بدمو الكذب. بالشريان عالق

الصدق مإلو عندو سِيادي

و لتمريمو بمجالو عالسوابق

نـال من الكذب أرفع شهادة

حبل الكذب ما أقصر خطوطو

بسهولة بتقدر تدَمِّر خيوطو

حكي الكذاب بيخالف ضميرو

و كلامو فرفطو الموج بشطوطو

عأرض الصدق ما حَـدَّد مصيرو

و ببحر الكذب غَـرَّق أخطبوطو

صواريخو الكذب بلشوا يطيرو

و بلا أهداف بيصيرو يشوطو

صدق الصدق معناتو أمانه

و كذب الكذب مـأواه خيانه

الكذب ما إلو رجلين حتّى

 يمشي و للفضيحة جناح تاني

المُخادع كل شي منو تـأتى

غير الكذب و الخدعة الملانه

كيف ما كلمتو الكذاب زَتـَّى

بتتدحرج كرة تلج المعاني

إذا حبيت ..ما تعمل مُخادع

و بكذبك بالهوى تقَلِّـب مواجع

المرأة إذا حَبِّـت زاد فيها

الصدق بالحب وين ما كان واقع

بصدق الحكي قادر تحتويها

لكن بالكذب إبعد و طالع

ما بتقدر بكذبك تشتريها

حتّى لو كنت ساكن بجامع