فَتّشِتْ بين النّاسْ

تا شُوفْ حَدَا من النّاسْ

ما لْقِيْت النّاسْ

**

دَخْلَكْ يا أللهْ!

وين رَاحُوا النّاس؟!

**

النّاس راحُوا مع بيوت الطّينْ

يومْ كانَتِ الحَاراتْ

وِالبيت لِزْقِ البيتْ

وِالشُّبَّاكْ !

يْفيق من دَغْشِةْ

يِفْتَحْ على الشُّبَّاكْ

وِالنّوم عَ الأَسَاطِيحْ

وِاليوم لا في سْطُوح ولا في نْجومْ

وْلا قمرْ في الليل ولا في غيوم

كِنْهِنْ انْسَرَقُوا

طلع القمرْ غاب القَمََرْ

وين القمر؟

لا عِلِمْ عَنُّو وْلا خَبَرْ

سمعتهن بيقولوا: ما عادْ في قمرْ

معقول يا ألله !

ما عاد في قمر؟ّ!

**

وصوت عمْ بيقولْ:

دخلك يا ألله

وْلا مَطَرْ

وْلا في نَدَى

وْنومِةْ ضَحْى

وِالنّوم من نومُو اسْتَحَى

صَحِّ الحَكِي

وْفي صوت جايِ من المَدَى:

“ما في حَدَا

لا تِنْدَهِيْ ما في حَدَا!”

وْلا طير طايرْ عَ الهَدَى

لا تِنْدَهِيْ ما في حَدَا !

****

من لقاء زجلي فلسطيني

جرى في زمن بيعيد للشعراء:

محمد ابو السعود الأسدي وأخيه قاسم ابو غازي الأسدي لهما الرحمة وسعود الأسدي:

افتتح أبو السّعود الأسدي بهذه الطلعة من المِعنَّي التَرشيحيّ أي الذي يرشّح

القافية ولا محيد عنها قال :

الدَّهِرْ عَنْ حُبُّو ولا مِرْتاب تَابْ **** بْرَغِمْ ضَرْباتْو اللي منها الشابْ شَابْ

بِرْمِي وْسَهْمُو بْمَجْمَع الأعْصَاب صَابْ ** وْبِفْتَح لَهْجْر وْفُرْقِةْ الأحْبابْ بَابْ

وْبُغْرُزْ بِحِيْنِنْ غَدَرْ فــي لِجْنَاب نَابْ ****** وْبالحقيقهْ بْلُعْب هَالالعابْ عَابْ

والدَّهرْ من كِذْبْو تَرَى الكَذَّاب ذَابْ **** وِاللي عَ يَدّو شِرِبْ بِالانْخَابْ خَابْ

فأجابه أبو غازي الأسدي ملتزمًا التّرشيح :

الدَّهــرْ بين النّاس بِالاحقَاد قَــادْ ******* جيش رايـــحْ جايْ بالاُوغَــاد غادْ

واقِفْ لأَهْل الفَضِلْ بِالمِرْصَاد صَادْ ***** وْعَالْلِي كانُوا قْرابْ بالإبْعَاد عادْ

إقْنَعْ بِدَهْرَك تَجْدْ إنّو الزَّاد زَادْ ******** وِاطعَمْ وْإسْقِـى وْمَنْهَل الوَرَّاد رَادْ

بتشوف خيرَكْ نَمَا وْبالأمجــاد جادْ ******* وْبِنْفَعْ بِأبنائَك وفي الأحْـفاد فادْ

فردَّ سعود الأسدي ملتزمًا التّرشيح كذلك :

النَّاس شِرْبُوا بْلَيْلةِ الأفـــرَاح رَاحْ ***** وْعَنْهِنْ ظَلام اليأس وِالاترَاح راحْ

وْشُو هَالكلام اللي مع الُّلفّاح فَاحْ******** اليازِجي لو سِمْعُو في هَالسّاح ساحْ

نُوْرُوْ لَمَعْ وِبْطَلْعِـة الإصْبَاح باحْ **** وِالطَّيْر فوق الغُصُنْ بالإِفْصَاح صَاحْ

عَنُّو المَعَـِريّ عَــرّْ وِالطِرْمَاح مَاحْ ******* حَطِّ التَّحْدِّي حَدِّ حَدِّ سْـلاح لاحْ

فعاود ابو السعود الأسدي متحدّيًا :

رُمْحِي بيوم المعركِهْ الأبطَال طَــالْ ****وْبَطش كَفِّي الجَبَلْ عَ الجُهّـــال هــالْ

وْصَدَّيت أهل الفـــنّْ وِالعَسّـــال سَالْ ****** بالدمّ لمّا قاصِف الآجــال جَالْ

وِالنّاس قالتْ: شاعِر العُقَّال قَالْ:********* إنْ شُفْتْ إنُّو الدَّهِرْ بِالأحْمـال مالْ

إسْمَعْ كلامي وْشُوف في الاقفال فَالْ********* وْلَهِجْتي بْتِشْفي من البَلْبَال بالْ

فأجاب أبو الغازي :

عند المداوي قوم يا مْجْرُوح رُوْح ْ***** منشان تِحْيِي بْجِسْمِكْ المَطْرُوح رْوْح ْ

وان كان قلبك بالرِّمِشْ مَذبُوح بُوْحْ *****وان كانْ عقلَكْ بالهوى مَمْسُوح سُوْحْ

وانْشقَّ الّزْهر وْبالشّذَى المسفُوح فُوحْ****وِاعْشَقِ البَدْر وْبالسَّنَى المَشْلـوح لُوْحْ

أرْسَى السَّفِيْنِه وما بَقَاش يْنوح نُوْحْ ***وِاطْرَبْ عَ مَدْحِي وْهيك يا مَمْدُوْحْ دُوْح

فَرَدَّ سعود الأسَدي :

لَوْ جِيْت أبني بْنَغْمِةِ الإحْسَاس سَاسْ*****بِطْلَعْ كَلامي بْموكِبْ الأعــراسْ راسْ

وْما على الوَرْدِهْ اذا بتنبَاسْ بَاسْ******والكاس مالُو؟ انْ سِكْرُوا بالايناس نـاسْ

وشعري غدا كالخمر والقرطاس طاسْ ** وْما انبخس قولي قطّْ والبَخَّاس خَاسْ

وعا غْصْن شِعْري اللفظ بالنُّوماس مَاسْ**لابِسْ مْخَمَّسْ وِالخَمِسْ أخْمَاسْ مَـاْس

فقال أبو السّعود :

ما يوم فُلْكِي في دُجَى الأبْحار حارْ ****وما لِحِقْ مُهْر السَّبّقْ فـي الأْوعَار عَارْ

وْبِالشِّعر صِيْتي بسائِر الاقطار طَارْ ** واللي سَبَحْ فـي عَيْلَمِي الزَّخَّارْ خــارْ

وسيفي اليماني يوشـّح الزّنار نَارْ ******* مثل البوارق لو حدا عالجار جارْ

ومن شَجَرْ فَنِّي يُقْطُف الاثْمار مارْ ****** وْيُنْقُلْ حديث البِرّ في الأخبار بارْ

وختم سعود الأسدي:

إعْزِفْ بِريشةِ المَوْهَبِهْ يا سْعُود عُودْ *** وْقديش عِنْدَك بالحَلا المَوْعُود عُودْ

وْقدّيش عندك من بَزِعْ موجُود جُوْدْ **** وفي التَّحدّي بالزَّجَل عَ أَسُود سُودْ

ومن هون بالمورود لَيَبْرُود رُودْ********* وْجيشَكْ عَلَى الشُّعَرا بلا مَنْقُود قُودْ

وْلو رُبِعْ جُهْدَكْ بَذَلْ في المَجْهُود هُود ** ما كان أبْقَى من الوجوه السُّود سُودْ