صبحيّه
ها الصبح شقفة ضوّ من عينَيك،
ها الشمس لمعة وجهَك العاري؛
ربّي…نهاري مسبحه بإيدَيك،
طوِّل الصبح وبارِك نهاري!
،،،،،،
المحبّه لْ ما بتساع:
أنانيّه.
الأنانيّه شبّاك
مسكّر بوجه الشمس.
،،،،،
سألت النجاح:
مش ناوي ترتاح؟
تبسّم…وراح!
،،،،،،
يا لوني المحبوس بالمرايات،
ولنُّو حوّل وقُول: مرحبا!
،،،،،
قالت الغنيّه:
الزعل أحلى من النسيان.
شُو حلو!
كأنو الزعل حُب بالمقلوب.
،،،،،،
“المعرفه قُوت المحبّه”
عنوان كتاب المرحوم ابن عمي المطران.
بس السؤال الصعب:
كيف بتحترم الآخر
وانت عم تشرّحُو بالأسئلة؟
،،،،،،،
شهر العدرا ورمضان:
زنبق وصْيام وغفران…
يمكن الله شهقِة رُوح،
انفلشِت عا كلّ الأديان!
مرتبط
