كتَبت القصيده والقوافي مصَدَقه
عَ جبين شعري كتبت أحلا معلَقه
عَ طيردبا جيت وتركت الفَرَس
يسهر مع الشعار هالليله حَرَس
ليلة فرَح بهالمسا دقو الجَرَس
بعدا القصيده بقلب عبله معَلَقَه
***
طيردبا مش بس دمعة رمش عين
يَمّا : شي كلمة تخبت بعب الزمان
طيردبا ياما لها عالكون دين
تاج الكرامة ع جبين العنفوان
***
فيكي يا طيردبا شو هالإسم البديع
التاريخ سجل مجد مش ممكن يضيع
تأملوا فيها ختم إسمو الإله
واجب عليها قلبها يساع الجميع
***
فيكي يا طيردبا إلهي معتني
من أجمل لأبدع حلاكي هالسني
شعّار سهرانين ع شمال ويمين
وحبك نبع فوار فايض ع الدني
***
طيردبا الكرامه والكرامه وين
مجد وثقافه عطيِّت الإنسان
ب طيردبا الشاعر بيسكر مرتين
ع الارض مرة وبالسما مره كمان
(طَيردبا ٤ نيسان ٢٠١٩)
***
(*) قصيدة الافتتاح في أمسية شعرية في نادي الـمستقبل الثقافـي فـي بلدة طيـر دبَّا قضاء صور.
