موريس عواد

(شاعر-لبنان)

آخ منَّك يا ملك بيروت

يا تاجر الألماز والياقوت

يا بايع المفتاح للسواح.

جيابَك وسيعا معبّيا بَسْكوت.

يا خْيال حالَك، يا شبح مرتاح

فوق العرش، يا صخر مش منحوت.

يا شي بنصّ الدرب ما بينزاح.

يا سَيف خِلصت قصّتو. ومزتوت

تحت الدرج … يا إنت

يا مش إنت

يا زهر يابس فوق شي تابوت.

بْصِرتَك بنومي إيد، جَيبي، تمّ

كبّوت فاضي، زرّ تحت الكِمّ

وخْيال ما بيضهر ولا بيفوت.

آخ مِنَّك يا ملك بيروت.

يا ألف غافي وألف مش نعسان.

يا نوم تاني بقلب بحر النوم.

لا حكي بعيونَك ولا ألوان.

بالفِكرعمرَك يوم، يمكن يوم

وبالنوم عمرَك ألف ألف ويوم.

قام الملك

نام الملك

قام الملك تا يشرب ويرجع ينام.

إيدَك طويلي سارقا الحرام

إسمَك غلط عَ دفتر الإيّام.

يا رقم عشرا عَ ضهر كبّوت

وآخ منَّك يا ملك بيروت.

يا رماد بارد، يا حكي معَوكَر،

يا باب لا مسكّر ولا مفتوح.

ريحَك أنا يا بيرق مزوَّر

فوق السطوح. وبالهوا بيلوح.

يا نهار أسود، يا ضحك أصفر

يا حلم أحمر عم يصبّ جروح.

يا خوف مارق عَ بيوت بيوت،

وآخ منَّك يا ملك بيروت،

مسمار إنت، اندقّ من هاك السنين

تعايقة طرابيش حمر بيلمعو.

وتحت كل طربوش في خمس ملايين.

هَودي تمن لَ إصبعَك تا تطبعو

بآخر الورقا، وآخ من شقفة ملك

عم يدير المملكي بِ إصبعو.

أخ لو الله أنا، بخلّي الفَلَك

يشتّي عليك حجار، كلُّن يوقعو

عا إصبَعك. يا فايت بمشلح كبير

منّو إلَك. يا كبير شو بعدَك زغير.

ومربوط إنت بخيط، بكرا بيقطعو

مقصّ الشعب. يا ساكن الدينار

بتنام بالدينار

بتقوم بالدينار

إلاّ إلَك ما تهرّب الياقوت

وآخ منَّك يا ملك بيروت

يا بسّ تقرا بيضحكو عليك الزغار

يا بسّ تحكي بيضحكو كلّ الكبار

وان شفتهُن ما زقّفو

بتشلحلهُن دينار

وان شفتهُن ما قَوّصو

بتقوِّص وبتغار.

وان شفتهُن ما هَيّصو

بْتبعت رجال يهيّصو

وبتضلّ خلف ستار.

يتزكُر الليلي الباكيي وهاك الصبح

وهاك اللّي شفتُن عَ البواب تقوّصو؟

مبارح رقصتا رقصتَك فوق الجرح

وهلّق وراقي بقصّتَك عم يرقصو.

ورح ضلّ إكتُب شعر حتى تموت

وآخ منَّك يا ملك بيروت.

*****

(*) من ديوان “آخ”  1974